لیبیا میں غیرقانونی تارکین وطن کی کشتی ڈوب گئی، 61 تارکین وطن لاپتا

 

**_لیبیا میں غیرقانونی تارکین وطن کی کشتی ڈوب گئی، 61 تارکین وطن لاپتا ہوگئے، لاپتا افراد کو ہلاک قرار دے دیا گیا۔_**

**_خبرایجنسی کے مطابق کشتی پر سوار 86 سے زائد مسافروں میں سے 25 زندہ بچا لیا گیا۔_**

**_انٹرنیشنل آرگنائزیشن فار مائگرینٹس (آئی او ایم) کے مطابق بچ جانے والے افراد نے بتایا کہ کشتی لیبیا کے شمال مغربی ساحل سے روانہ ہوئی تھی، کشتی میں سوار زیادہ تر افراد کا تعلق نائیجیریا، گیمبیا اور دیگر افریقی ممالک سے تھا۔_**

**_آئی او ایم کے مطابق لیبیا میں ڈوبنے والی کشتی میں سوار افراد میں بچے اور خواتین بھی شامل تھے، بچائے گئے افراد کو حراستی مرکز منتقل کرکے طبی امداد دی گئی۔_**

**_آئی او ایم کے ترجمان فلاویو ڈی گیاکومو کے مطابق رواں برس میڈیٹیرین مائیگرینٹ روٹ پر 2250 سے زائد افراد اپنی جانیں گنوا چکے ہیں، یہ تعداد بتاتی ہے کہ بدقسمتی سے اب تک سمندر میں زندگیاں بچانے کیلئے کیے گئے اقدامات ناکافی ہیں۔_**

**_جون کے مہینے میں لیبیا سے اٹلی جانے والی کشتی ایڈریانا کے ساتھ یونان کے پانیوں میں پیش آنے والے واقعے میں بھی 750 افراد ہلاک ہو گئے تھے۔_**