کزن سے شادی سے بچنے کیلئے امریکی فضائیہ میں شامل ہونیوالی پاکستانی لڑکی کی دلچسپ کہانی

2022 میں حمنہ ظفر نے ایک اور جرآت مندانہ قدم اٹھایا اور امریکی ائیر فورس میں بھرتی ہو گئیں، جہاں وہ اب سکیورٹی ڈیفنڈر کے طور پر خدمات انجام دے رہی ہیں۔

پاکستانی نسل کی امریکی لڑکی حمنہ ظفر نے والدین کی پسند سے کزن سے ہونے والی شادی سے بچنے کے لئے امریکا کی فضائیہ میں شمولیت اختیار کرلی ہے۔

امریکی میگزین کی رپورٹ کے مطابق، حمنہ ظفر نامی لڑکی کی خاندانی اور ثقافتی دباؤ کے خلاف مزاحمت اور انفرادی خوابوں کے حصول کے لئے جدوجہد کی دلچسپ کہانی سامنے آئی ہے، جس نے صرف 19 سال کی عمر میں اپنی زندگی کا اہم ترین فیصلہ کیا۔

حمنہ کو معلوم تھا کہ اگر وہ والدین کی پسند کے خلاف جاتی ہے، یعنی پاکستان میں مقیم کزن سے شادی سے انکار کرتی ہے، تو وہ خاندان سے محروم ہوجائے گی، اس کے باوجود اس نے بغاوت کی اور اپنے خوابوں کو پائے تکمیل تک پہنچانے کا عزم کیا۔

2019 میں حمنہ، جب اپنی فیملی کے ساتھ پاکستان آئیں، تو اُنہیں یہ معلوم ہوا کہ ان کی فیملی پاکستان میں صرف ان کے رشتے داروں سے ملنے کے لئے نہیں بلکہ یہاں ان کی منگنی کرنے 

آئی ہے۔

اس انکشاف نے حمنہ ظفر کو بالکل حیران اور پریشان کر دیا، کیونکہ اُن پر ایسے انسان سے منگنی کرنے کے لئے دباؤ ڈالا جارہا تھا جس کا اُنہوں نے انتخاب نہیں کیا تھا۔

ایسی صورتِ حال میں حمنہ کو اپنے والدین کی روایات اور ان کی اپنی خواہشات میں سے کسی ایک کا انتخاب کرنا پڑا، لڑکی نے اپنی خودمختاری کی قربانی دینے سے انکار کرتے ہوئے ایک جرآت مندانہ منصوبہ بنایا اور امریکی بحریہ میں بھرتی کرنے والے ایک افسر کے پاس پناہ حاصل کی اور بعد میں کچھ عرصے کے لئے اپنے ایک کالج فرینڈ کی فیملی کے پاس رہنے لگیں۔

حمنہ ظفر کو کلاڈیا بیریرا نامی ایک خاتون نے اپنے گھر میں پناہ دی اور ایسوسی ایٹ ڈگری مکمل کرنے کے لئے درکار مدد فراہم کی، اسی لئے اب حمنہ ظفر کلاڈیا بیریرا کو "ماں" کہ کر پکارتی ہیں۔

2022 میں حمنہ ظفر نے ایک اور جرآت مندانہ قدم اٹھایا اور امریکی ائیر فورس میں بھرتی ہو گئی ہیں، جہاں وہ اب سکیورٹی ڈیفنڈر کے طور پر خدمات انجام دے رہی ہیں۔